ᠨᠡᠷᠡ：
ᠲᠠᠸᠠᠴᠢ
ᠴᠢᠨᠠᠷ ᠤᠨ ᠢᠯᠭᠠᠯ：
ᠨᠢᠭᠤᠴᠠ
ᠬᠠᠷᠢᠯᠴᠠᠬᠤ ᠬᠡᠯᠪᠡᠷᠢ：
ᠵᠣᠬᠢᠶᠠᠭᠴᠢ ᠶᠢᠨ ᠲᠠᠨᠢᠯᠴᠠᠭᠤᠯᠭᠠ：
ᠲᠠᠸᠠᠴᠢ ︵ᠦᠬᠦᠵᠦ ᠲᠥᠷᠦᠭᠰᠡᠨ ᠣᠨ ᠵᠢᠯ ᠨᠢ ᠲᠣᠳᠤᠷᠬᠠᠢ ᠦᠭᠡᠢ ︶ ᠵᠦᠩᠭᠠᠷ ᠤᠨ ᠬᠠᠭᠠᠨ᠃ ᠶᠡᠬᠡ ᠴᠧᠷᠡᠩᠳᠣᠨᠳᠤᠪ ᠤ᠋ᠨ ᠣᠮᠪᠤᠯᠤ ᠬᠥᠪᠡᠭᠦᠨ ᠨᠢ ᠮᠥᠨ᠃ ᠲᠠᠸᠠᠴᠢ ᠨᠢ ᠣᠯᠠᠨ ᠲᠠᠢᠵᠢ ᠵᠠᠢᠰᠠᠩ ᠤᠨ ᠳᠣᠲᠤᠷᠠᠬᠢ ᠪᠠᠢᠷᠢ ᠰᠠᠭᠤᠷᠢ ᠪᠠᠷ ᠥᠨᠳᠦᠷ᠂ ᠨᠥᠯᠦᠭᠡ ᠲᠤᠰᠭᠠᠯ ᠢ᠋ᠶ᠋ᠠᠷ ᠶᠡᠬᠡ ᠠᠮᠤᠷᠰᠠᠨᠠᠭᠠ ᠯᠤᠭᠠ ᠠᠯᠢ ᠴᠢᠳᠠᠬᠤ ᠪᠠᠷ ᠡᠶᠡᠳᠡᠨ ᠪᠦᠯᠬᠦᠮᠳᠡᠵᠦ ᠯᠠᠮᠠᠳᠠᠷᠵᠠ ᠶ᠋ᠢᠨ ᠨᠣᠶᠠᠷᠬᠠᠯ ᠢ ᠨᠤᠷᠠᠭᠠᠬᠤ ᠪᠠᠷ ᠤᠷᠤᠯᠳᠤᠪᠠ᠃ ᠴᠢᠩ ᠤᠯᠤᠰ ᠤᠨ ᠲᠡᠭᠷᠢ ᠲᠡᠳᠭᠦᠭᠴᠢ ᠶ᠋ᠢᠨ ᠠᠷᠪᠠᠨ ᠵᠢᠷᠭᠤᠳᠤᠭᠠᠷ ᠣᠨ ︵ 1751 ︶ ᠤ ᠶᠢᠰᠦᠳᠦᠭᠡᠷ ᠰᠠᠷᠠ ᠳᠤ ᠲᠠᠸᠠᠴᠢ ᠠᠴᠠ ᠠᠮᠤᠷᠰᠠᠨᠠᠭᠠ ᠴᠠᠭᠳᠤᠷ᠂ ᠳᠥᠷᠪᠡᠳ ᠦ᠋ᠨ ᠲᠠᠢᠵᠢ ᠳ᠋ᠠᠰᠢ ᠵᠢᠴᠢ ᠲᠡᠭᠦᠨ ᠦ ᠳᠡᠭᠦᠦ ᠬᠣᠱᠤᠳ ᠠᠢᠮᠠᠭ ᠤᠨ ᠲᠠᠢᠵᠢ ᠪᠠᠯᠵᠤᠤᠷ ᠨᠠᠷ ᠢ ᠬᠤᠷᠠᠯᠳᠤᠭᠤᠯᠵᠤ ᠯᠠᠮᠠᠳᠠᠷᠵᠠ ᠶ᠋ᠢ ᠲᠦᠯᠬᠢᠨ ᠤᠨᠠᠭᠠᠵᠤ ᠭᠠᠯᠳᠠᠨᠴᠡᠷᠢᠨ ᠦ᠌ ᠣᠳᠭᠤᠨ ᠬᠥᠪᠡᠭᠦᠨ ᠴᠧᠸᠠᠩᠳᠠᠰᠢ ᠶᠢ ᠬᠠᠭᠠᠨ ᠪᠣᠯᠭᠠᠬᠤ ᠪᠠᠷ ᠬᠤᠤᠪᠢᠯᠳᠤᠵᠠᠢ᠃ ᠳᠥᠷᠪᠡᠳ ᠦ᠋ᠨ ᠲᠠᠢᠵᠢ ᠳ᠋ᠠᠰᠢ ᠡᠨᠡ ᠬᠦ ᠨᠢᠭᠤᠴᠠ ᠶᠢ ᠯᠠᠮᠠᠳᠠᠷᠵᠠ ᠳ᠋ᠤ᠌ ᠮᠡᠳᠡᠭᠦᠯᠦᠭᠰᠡᠨ ᠳᠦ ᠯᠠᠮᠠᠳᠠᠷᠵᠠ ᠲᠡᠭᠦᠨ ᠦ ᠳᠡᠭᠦᠦ ᠶᠢ ᠰᠢᠳᠭᠡᠨ ᠠᠯᠠᠵᠤ ᠡᠰᠡᠷᠡᠭ ᠵᠠᠢᠰᠠᠩ ᠢᠶᠠᠷ ᠴᠡᠷᠢᠭ ᠳᠠᠢᠴᠢᠯᠠᠭᠤᠯᠤᠨ ᠲᠠᠸᠠᠴᠢ ᠪᠣᠯᠤᠨ ᠠᠮᠤᠷᠰᠠᠨᠠᠭᠠ ᠶᠢ ᠪᠤᠲᠠᠷᠠᠲᠠᠯᠠ ᠴᠣᠬᠢᠭᠤᠯᠪᠠ᠃ ᠡᠭᠦᠨ ᠳᠦ ᠲᠠᠸᠠᠴᠢ᠂ ᠠᠮᠤᠷᠰᠠᠨᠠᠭᠠ ᠬᠠᠰᠠᠭ ᠵᠦᠭ ᠵᠢᠭᠤᠳᠠᠨ ᠳᠤᠲᠠᠭᠠᠵᠤ᠂ ᠶᠧᠮᠢᠯ ᠭᠣᠣᠯ ᠤᠨ ᠵᠡᠭᠦᠨ ᠬᠣᠢᠲᠤ ᠲᠠᠯᠠ ᠶᠢᠨ ᠴᠠᠭᠠᠨ ᠬᠤᠵᠢᠷ᠂ ᠶᠡᠷᠦᠺᠡ ᠭᠣᠣᠯ ᠤᠨ ᠬᠠᠪᠢ ᠳᠤ ᠬᠦᠷᠦᠭᠡᠳ ᠳᠠᠯᠳᠠᠭᠤᠷ ᠬᠥᠮᠦᠨ ᠲᠣᠮᠢᠯᠠᠨ ᠢᠯᠢ ᠳᠡᠬᠢ ᠯᠠᠮᠠ ᠨᠠᠷ ᠯᠤᠭᠠ ᠬᠠᠷᠢᠴᠠᠭᠠ ᠬᠣᠯᠪᠤᠭᠠ ᠠᠪᠴᠤ ᠯᠠᠮᠠᠳᠠᠷᠵᠠ ᠶ᠋ᠢᠨ ᠪᠡᠶᠡ ᠶᠢᠨ ᠬᠢᠨᠢ ᠳᠡᠷᠭᠡᠳᠡ ᠪᠠᠢᠭᠠ ᠬᠥᠮᠦᠰ ᠢ᠋ᠶ᠋ᠡᠷ ᠳᠣᠲᠤᠷᠠ ᠠ᠋ᠴᠠ ᠨᠢ ᠲᠤᠰᠠᠯᠠᠭᠤᠯᠤᠨ 1500 ᠬᠥᠮᠦᠨ ᠢ᠋ ᠳᠠᠭᠠᠭᠤᠯᠤᠨ ᠢᠯᠢ ᠳᠦ ᠭᠡᠨᠡᠳᠲᠡ ᠴᠥᠮᠦᠷᠡᠨ ᠣᠷᠤᠵᠤ ᠯᠠᠮᠠᠳᠠᠷᠵᠠ ᠶ᠋ᠢ ᠠᠯᠠᠭᠠᠳ ᠠᠮᠤᠷᠰᠠᠨᠠᠭᠠ ᠲᠠᠸᠠᠴᠢ ᠶᠢ ᠡᠷᠭᠦᠵᠦ ᠵᠦᠩᠭᠠᠷ ᠤᠨ ᠬᠠᠭᠠᠨ ᠪᠣᠯᠭᠠᠭᠰᠠᠨ ᠶᠤᠮ᠃ ᠲᠠᠸᠠᠴᠢ ᠬᠠᠭᠠᠨ ᠣᠷᠤ ᠶ᠋ᠢ ᠪᠤᠯᠢᠶᠠᠭᠰᠠᠨ ᠤ ᠳᠠᠷᠠᠭᠠ ᠠᠮᠤᠷᠰᠠᠨᠠᠭᠠ ᠶᠢᠨ ᠲᠡᠭᠦᠨ ᠢ ᠡᠷᠭᠦᠵᠦ ᠬᠠᠭᠠᠨ ᠰᠠᠭᠤᠯᠭᠠᠭᠰᠠᠨ ᠭᠠᠪᠢᠶᠠ ᠳᠤᠨᠢ ᠲᠠᠯᠠᠷᠬᠠᠵᠤ ᠲᠠᠷᠪᠠᠭᠠᠲᠠᠢ ᠶᠢᠨ ᠨᠤᠲᠤᠭ ᠢ ᠲᠡᠭᠦᠨ ᠳᠦ ᠰᠣᠶᠤᠷᠬᠠᠨ ᠥᠭᠴᠡᠢ᠃ ᠲᠡᠭᠡᠭᠡᠳ ᠪᠠᠰᠠ ᠥᠩᠭᠡᠷᠡᠭᠰᠡᠨ ᠳ᠋ᠦ᠍ ᠯᠠᠮᠠᠳᠠᠷᠵᠠ ᠯᠤᠭᠠ ᠨᠠᠢᠷ ᠲᠠᠢ ᠪᠠᠢᠭᠰᠠᠨ ᠲᠠᠢᠵᠢ᠂ ᠵᠠᠢᠰᠠᠩ ᠨᠠᠷ ᠢ ᠭᠠᠳᠠᠭᠤᠷᠴᠢᠯᠠᠨ ᠴᠣᠬᠢᠯᠲᠠ ᠥᠭᠪᠡ᠃ ᠲᠡᠭᠦᠨ ᠦ ᠡᠲᠡᠭᠡᠷ ᠠᠵᠢᠯᠯᠠᠭᠠ ᠨᠢ ᠵᠦᠩᠭᠠᠷ ᠤᠨ ᠲᠠᠢᠵᠢ ᠵᠠᠢᠰᠠᠩ ᠨᠠᠷ ᠤᠨ ᠳᠤᠷᠠ ᠦᠭᠡᠢᠴᠡᠯ ᠢ ᠳᠡᠭᠳᠡᠭᠡᠪᠡ᠃ ᠴᠢᠩ ᠤᠯᠤᠰ ᠤᠨ ᠲᠩᠷᠢ ᠲᠡᠳᠭᠦᠭᠴᠢ ᠶ᠋ᠢᠨ ᠠᠷᠪᠠᠨ ᠨᠠᠢ᠍ᠮᠠᠳᠤᠭᠠᠷ ᠣᠨ ︵ 1753︶ ᠤ ᠵᠤᠨ ᠪᠠᠭᠠ ᠴᠧᠷᠡᠩᠳᠣᠨᠳᠤᠪ ᠤ᠋ᠨ ᠣᠮᠪᠤᠯᠤ ᠨᠡᠮᠡᠬᠦᠵᠢᠷᠭᠠᠯ ᠳᠥᠷᠪᠡᠳ ᠠᠢᠮᠠᠭ ᠤᠨ ᠳᠡᠮᠵᠢᠯᠭᠡ ᠳᠣᠣᠷᠠ 1 ᠲᠦᠮᠡᠨ ᠴᠡᠷᠢᠭ ᠳᠠᠢᠴᠢᠯᠠᠨ ᠢᠯᠢ ᠶᠢ ᠴᠣᠬᠢᠭᠰᠠᠨ ᠳᠤ ᠲᠠᠸᠠᠴᠢ ᠲᠤᠯᠵᠤ ᠳᠡᠢᠯᠬᠦ ᠦᠭᠡᠢ ᠪᠣᠯᠬᠣᠷ ᠬᠠᠭᠤᠴᠢᠨ ᠮᠠᠯᠵᠢᠯ ᠤᠨ ᠨᠤᠲᠤᠭ ᠴᠠᠭᠠᠨ ᠬᠤᠵᠢᠷ ᠵᠦᠭ ᠢᠶᠡᠨ ᠵᠢᠭᠤᠳᠠᠨ ᠳᠤᠲᠠᠭᠠᠵᠤ ᠠᠮᠤᠷᠰᠠᠨᠠᠭᠠ ᠯᠤᠭᠠ ᠠᠭᠤᠯᠵᠠᠪᠠ᠃ ᠠᠷᠪᠠᠳᠤᠭᠠᠷ ᠰᠠᠷᠠ ᠳᠤᠨᠢ ᠠᠮᠤᠷᠰᠠᠨᠠᠭᠠ ᠨᠡᠮᠡᠬᠦᠵᠢᠷᠭᠠᠯ ᠢ᠋ ᠮᠡᠬᠡᠯᠡᠨ ᠶᠧᠮᠢᠯ ᠦᠨ ᠡᠮᠦᠨᠡᠲᠦ ᠨᠤᠲᠤᠭ ᠲᠤ ᠠᠪᠠᠴᠢᠵᠤ ᠠᠯᠠᠭᠰᠠᠨ ᠪᠢᠯᠡ᠃ ᠲᠠᠸᠠᠴᠢ 5000 ᠴᠡᠷᠢᠭ ᠳᠠᠢᠴᠢᠯᠠᠨ ᠡᠷᠴᠢᠰ ᠣᠷᠤᠨ ᠵᠦᠭ ᠴᠡᠷᠢᠭᠯᠡᠪᠡ᠃ ᠳᠥᠷᠪᠡᠳ ᠦ᠋ᠨ ᠶᠡᠬᠡ ᠲᠠᠢᠵᠢ ᠴᠧᠷᠠᠩ ᠨᠠᠷ ᠠᠢᠮᠠᠭ ᠤᠨ ᠣᠯᠠᠨ ᠢᠶᠠᠨ ᠳᠠᠭᠠᠭᠤᠯᠵᠤ ᠵᠡᠭᠦᠨᠰᠢ ᠠᠯᠲᠠᠢ ᠨᠢᠷᠤᠭᠤ ᠶᠢ ᠳᠠᠪᠠᠵᠤ ᠴᠢᠩ ᠤᠯᠤᠰ ᠲᠤ ᠣᠷᠤᠵᠤ ᠥᠭᠭᠦᠭᠰᠡᠨ ᠪᠣᠯᠬᠣᠷ ᠲᠠᠸᠠᠴᠢ ᠢᠯᠢ ᠳᠡᠭᠡᠨ ᠪᠤᠴᠠᠵᠠᠢ᠃ ᠠᠮᠤᠷᠰᠠᠨᠠᠭᠠ ᠭᠠᠪᠢᠶᠠ ᠲᠠᠢ ᠤᠴᠢᠷ ᠠᠴᠠ ᠶᠧᠮᠢᠯ ᠭᠣᠣᠯ ᠤᠨ ᠵᠡᠭᠦᠨ ᠬᠣᠢᠨᠠᠬᠢ ᠶᠡᠷᠦᠭᠡ ᠡᠴᠡ ᠵᠠᠢᠰᠠᠩ ᠨᠠᠭᠤᠷ ᠤᠨ ᠡᠮᠦᠨᠡ ᠲᠠᠯᠠ ᠶᠢᠨ ᠡᠷᠴᠢᠰ ᠮᠥᠷᠡᠨ ᠦ᠌ ᠰᠠᠪᠠ ᠭᠠᠵᠠᠷ ᠤᠳ ᠨᠢ ᠲᠡᠷᠡ ᠴᠢᠭ ᠢᠶᠡᠷ ᠢᠶᠡᠨ ᠠᠮᠤᠷᠰᠠᠨᠠᠭᠠ ᠶᠢᠨ ᠮᠠᠯᠵᠢᠯ ᠤᠨ ᠨᠤᠲᠤᠭ ᠪᠣᠯᠵᠠᠢ᠃ ᠳᠡᠮᠡᠢ ᠤᠳᠠᠯ ᠦᠭᠡᠢ ᠲᠠᠸᠠᠴᠢ ᠡᠳᠦᠷᠵᠢᠨ ᠠᠷᠢᠬᠢᠨ ᠳᠤ ᠰᠣᠭᠲᠤᠭᠤᠷᠠᠵᠤ ᠵᠠᠰᠠᠭ ᠶᠠᠪᠤᠭᠤᠯᠬᠤ ᠴᠢᠳᠠᠪᠤᠷᠢ ᠪᠠᠨ ᠠᠯᠳᠠᠪᠠ᠃ ᠡᠭᠦᠨ ᠳᠦ ᠵᠦᠩᠭᠠᠷ ᠤᠨ ᠨᠤᠲᠤᠭ ᠢ ᠬᠤᠪᠢᠳᠠᠬᠤ ᠭᠡᠵᠦ ᠠᠮᠤᠷᠰᠠᠨᠠᠭᠠ ᠳᠤᠷᠠᠳᠤᠯᠭᠠ ᠭᠠᠷᠭᠠᠭᠠᠳ ᠥᠯᠦ ᠪᠦᠲᠦᠭᠰᠡᠨ ᠲᠤᠯᠠ ᠴᠡᠷᠢᠭ ᠳᠠᠢᠴᠢᠯᠠᠨ ᠶᠧᠮᠢᠯ ᠭᠣᠣᠯ ᠤᠨ ᠡᠮᠢᠷ ᠣᠲᠤᠭ ᠲᠤ᠌ ᠬᠦᠷᠦᠭᠡᠳ 3000 ᠡᠷᠦᠬᠡ ᠶᠢ ᠤᠤᠯᠭᠠᠯᠠᠨ ᠠᠪᠠᠴᠢᠵᠠᠢ᠃ ᠴᠢᠩ ᠤᠯᠤᠰ ᠤᠨ ᠠᠷᠪᠠᠨ ᠨᠠᠢ᠍ᠮᠠᠳᠤᠭᠠᠷ ᠣᠨ ︵ 1753︶ ᠤ ᠠᠷᠪᠠᠨ ᠨᠢᠭᠡᠳᠦᠭᠡᠷ ᠰᠠᠷᠠ ᠠᠴᠠ ᠠᠷᠪᠠᠨ ᠬᠣᠶᠠᠳᠤᠭᠠᠷ ᠰᠠᠷᠠ ᠪᠣᠯᠲᠠᠯᠠ ᠲᠠᠸᠠᠴᠢ ᠠᠮᠤᠷᠰᠠᠨᠠᠭᠠ ᠶᠢ ᠭᠤᠷᠪᠠᠨᠲᠠ ᠳᠠᠢᠯᠠᠪᠠ᠃ ᠠᠮᠤᠷᠰᠠᠨᠠᠭᠠ ᠵᠡᠭᠦᠨ ᠭᠠᠷ ᠤᠨ ᠬᠠᠰᠠᠭᠴᠤᠳ ᠤᠨ ᠳᠡᠮᠵᠢᠯᠭᠡ ᠳᠣᠣᠷᠠ ᠢᠯᠢ ᠣᠷᠤᠨ ᠳ᠋ᠤ᠌ ᠴᠣᠬᠢᠨ ᠣᠷᠤᠪᠠ᠃ ᠲᠠᠸᠠᠴᠢ ᠲᠤᠯᠵᠤ ᠳᠡᠢᠯᠬᠦ ᠦᠭᠡᠢ ᠲᠤᠯᠠ ᠪᠣᠷᠤ ᠲᠠᠯᠠ ᠳᠤ ᠤᠬᠤᠷᠢᠨ ᠣᠴᠢᠪᠠ᠃ ᠡᠢᠨᠬᠦ ᠵᠢᠯ ᠦᠨ ᠬᠢᠨᠢ ᠬᠠᠪᠤᠷ᠂ ᠲᠠᠸᠠᠴᠢ 3 ᠲᠦᠮᠡᠨ ᠴᠡᠷᠢᠭ ᠳᠠᠢᠴᠢᠯᠠᠨ ᠡᠷᠴᠢᠰ ᠮᠥᠷᠡᠨ ᠦ᠌ ᠡᠬᠢ ᠳᠡᠬᠢ ᠮᠠᠯᠵᠢᠯ ᠤᠨ ᠨᠤᠲᠤᠭ ᠲᠤ ᠴᠣᠬᠢᠨ ᠣᠷᠤᠭᠰᠠᠨ ᠳ᠋ᠤ᠌ ᠠᠮᠤᠷᠰᠠᠨᠠᠭᠠ ᠪᠤᠷᠵᠠᠭ ᠤᠨ ᠬᠠᠪᠢ ᠳᠤ ᠤᠬᠤᠷᠢᠨ ᠣᠴᠢᠵᠠᠢ᠃ ᠡᠨᠡ ᠭᠠᠵᠠᠷ ᠲᠤ ᠠᠮᠤᠷᠰᠠᠨᠠᠭᠠ ᠴᠢᠩ ᠤᠯᠤᠰ ᠤᠨ ᠴᠡᠷᠢᠭ ᠦᠨ ᠬᠦᠴᠦ ᠶᠢ ᠵᠢᠭᠡᠯᠡᠵᠦ ᠳᠠᠸᠠᠴᠢ ᠶᠢ ᠰᠥᠨᠦᠭᠡᠬᠦ ᠠᠷᠭᠠ ᠪᠣᠳᠤᠯᠭᠠ ᠪᠠᠨ ᠲᠣᠭᠲᠠᠭᠠᠪᠠ᠃ ᠳᠣᠯᠤᠳᠤᠭᠠᠷ ᠰᠠᠷᠠ ᠶᠢᠨ ᠨᠠᠢ᠍ᠮᠠᠨ ᠤ ᠡᠳᠦᠷ ᠠᠮᠤᠷᠰᠠᠨᠠᠭᠠ 2 ᠲᠦᠮᠡ ᠭᠠᠷᠤᠶ ᠬᠥᠮᠦᠨ ᠢ᠋ᠶ᠋ᠡᠨ ᠳᠠᠭᠠᠭᠤᠯᠵᠤ ᠴᠢᠩ ᠤᠯᠤᠰ ᠲᠤ ᠪᠠᠭᠤᠨ ᠥᠭᠴᠡᠢ᠃ ᠴᠢᠩ ᠤᠯᠤᠰ ᠤᠨ ᠲᠩᠷᠢ ᠲᠡᠳᠭᠦᠭᠴᠢ ᠶ᠋ᠢᠨ ᠬᠣᠷᠢᠳᠤᠭᠠᠷ ᠣᠨ ︵ 1755︶ ᠤ ᠴᠠᠭᠠᠨ ᠰᠠᠷᠠ ᠳᠤ ᠴᠢᠩ ᠤᠯᠤᠰ ᠤᠨ ᠴᠡᠷᠢᠭ ᠵᠠᠮ ᠬᠤᠪᠢᠶᠠᠨ ᠵᠦᠩᠭᠠᠷ ᠬᠠᠭᠠᠨᠲᠤ ᠤᠯᠤᠰ ᠵᠦᠭ ᠴᠡᠷᠢᠭᠯᠡᠵᠡᠢ᠃ ᠠᠮᠤᠷᠰᠠᠨᠠᠭᠠ ᠠᠷᠤ ᠵᠠᠮ ᠤᠨ ᠬᠢᠯᠢ ᠶᠢ ᠲᠣᠭᠲᠠᠭᠠᠬᠤ ᠴᠡᠷᠢᠭ ᠦᠨ ᠲᠤᠰᠠᠯᠠᠭᠴᠢ ᠵᠠᠩᠵᠤᠨ ᠪᠣᠯᠵᠤ ᠤᠯᠢᠶᠠᠰᠤᠲᠠᠢ ᠠᠴᠠ ᠴᠡᠷᠢᠭ ᠣᠷᠤᠪᠠ᠃ ᠵᠦᠩᠭᠠᠷ ᠤᠨ ᠣᠯᠠᠨ ᠣᠲᠤᠭ ᠴᠢᠮᠡᠭᠡ ᠶᠢ ᠨᠢ ᠰᠣᠨᠤᠰᠤᠩᠭᠤᠲᠠ ᠪᠤᠯᠲᠤ ᠪᠠᠷ ᠢᠶᠠᠨ ᠪᠠᠭᠤᠨ ᠥᠭᠴᠡᠢ᠃ ᠲᠠᠸᠠᠴᠢ ᠣᠭᠲᠤᠬᠠᠨ ᠴᠤ ᠪᠡᠯᠡᠳᠭᠡᠯ ᠦᠭᠡᠢ ᠪᠠᠢᠭᠰᠠᠨ ᠲᠤᠯᠠ ᠣᠯᠠᠨ ᠣᠲᠤᠭ ᠠ᠋ᠴᠠ ᠴᠡᠷᠢᠭ ᠲᠠᠲᠠᠬᠤ ᠭᠡᠰᠡᠨ ᠪᠣᠯᠪᠠᠴᠤ ᠪᠦᠷ ᠴᠦ ᠬᠣᠵᠢᠮᠳᠠᠵᠠᠢ᠃ ᠴᠢᠩ ᠤᠯᠤᠰ ᠤᠨ ᠴᠡᠷᠢᠭ ᠪᠣᠷᠤ ᠲᠠᠯᠠ ᠳᠤ ᠨᠡᠢᠯᠡᠭᠰᠡᠨ ᠦ ᠳᠠᠷᠠᠭᠠ ᠬᠣᠶᠠᠷ ᠵᠠᠮ ᠢᠶᠠᠷ ᠢᠯᠢ ᠶᠢ ᠴᠣᠬᠢᠪᠠ᠃ ᠠᠮᠤᠷᠰᠠᠨᠠᠭᠠ ᠤᠷᠢᠳ ᠢᠶᠠᠷ ᠢᠯᠢ ᠳᠦ ᠴᠣᠬᠢᠨ ᠣᠷᠤᠵᠤ ᠣᠯᠠᠨ ᠣᠲᠤᠭ ᠤ᠋ᠨ ᠲᠠᠢᠵᠢ᠂ ᠵᠠᠢᠰᠠᠩ᠂ ᠯᠠᠮᠠ ᠨᠠᠷ ᠢ ᠢᠯᠪᠢᠨ ᠳᠠᠭᠠᠭᠤᠯᠵᠠᠢ᠃ ᠲᠠᠸᠠᠴᠢ ᠲᠦᠮᠡ ᠭᠠᠷᠤᠶ ᠴᠡᠷᠢᠭ ᠢᠶᠡᠨ ᠳᠠᠭᠠᠭᠤᠯᠤᠨ ᠢᠯᠢ ᠶᠢᠨ ᠪᠠᠷᠠᠭᠤᠨ ᠡᠮᠦᠨᠡᠬᠢ ᠬᠠᠲᠤᠨ ᠠᠭᠤᠯᠠ ᠳᠤ ᠣᠷᠤᠵᠤ ᠰᠠᠬᠢᠨ ᠰᠠᠭᠤᠪᠠ᠃ ᠠᠮᠤᠷᠰᠠᠨᠠᠭᠠ ᠦᠱ᠌ᠢ ᠬᠣᠲᠠᠨ ᠤ ᠬᠣᠵᠢᠰ ᠲᠤ ᠪᠦᠭᠭᠦᠯᠲᠡ ᠬᠢᠵᠦ ᠲᠠᠸᠠᠴᠢ ᠡᠴᠢᠭᠡ ᠬᠥᠪᠡᠭᠦᠨ ᠵᠡᠷᠭᠡ 70 ᠭᠠᠷᠤᠶ ᠬᠥᠮᠦᠨ ᠢ᠋ ᠪᠠᠷᠢᠪᠴᠢᠯᠠᠵᠤ ᠲᠠᠸᠠᠴᠢ ᠶᠢ ᠪᠡᠭᠡᠵᠢᠩ ᠳᠦ ᠬᠦᠷᠭᠡᠭᠰᠡᠨ ᠪᠠᠢᠵᠠᠢ᠃
Copyight 2016 by nmgmzw.gov.cn All Rights Reserved
