ᠨᠡᠷᠡ：
ᠲᠣᠭᠤᠭᠠ
ᠴᠢᠨᠠᠷ ᠤᠨ ᠢᠯᠭᠠᠯ：
ᠨᠢᠭᠤᠴᠠ
ᠬᠠᠷᠢᠯᠴᠠᠬᠤ ᠬᠡᠯᠪᠡᠷᠢ：
ᠵᠣᠬᠢᠶᠠᠭᠴᠢ ᠶᠢᠨ ᠲᠠᠨᠢᠯᠴᠠᠭᠤᠯᠭᠠ：
ᠲᠣᠭᠤᠭᠠ ( 1943—— ) ᠬᠢᠨᠠᠨ ᠣᠷᠴᠢᠭᠤᠯᠤᠭᠴᠢ᠃ ᠥᠪᠦᠷ ᠮᠣᠩᠭᠤᠯ ᠤ᠋ᠨ ᠰᠢᠯᠢ ᠵᠢᠨ ᠭᠣᠣᠯ ᠠᠢᠮᠠᠭ ᠤᠨ ᠰᠢᠯᠤᠭᠤᠨ ᠬᠥᠬᠡ ᠬᠣᠰᠢᠭᠤᠨ ᠳᠤ ᠲᠥᠷᠦᠵᠡᠢ᠃ 1966 ᠣᠨ ᠳᠤ ᠥᠪᠦᠷ ᠮᠣᠩᠭᠤᠯ ᠤ᠋ᠨ ᠶᠡᠬᠡ ᠰᠤᠷᠭᠠᠭᠤᠯᠢ ᠶᠢ ᠲᠡᠭᠦᠰᠭᠡᠭᠡᠳ 1968 ᠣᠨ ᠠᠴᠠ ᠥᠪᠦᠷ ᠮᠣᠩᠭᠤᠯ ᠤ᠋ᠨ ᠠᠷᠠᠳ ᠤᠨ ᠷᠠᠳᠢᠣ᠋ ᠨᠡᠪᠲᠡᠷᠡᠭᠦᠯᠭᠡ ᠵᠢᠨ ᠬᠣᠷᠢᠶᠠ ᠳᠤ ᠨᠠᠢᠷᠠᠭᠤᠯᠤᠭᠴᠢ ᠵᠢᠨ ᠠᠵᠢᠯ ᠬᠢᠪᠡ᠃ 1978 ᠣᠨ ᠳᠤ ᠥᠪᠦᠷ ᠮᠣᠩᠭᠤᠯ ᠤ᠋ᠨ ᠲᠧᠯᠸᠢᠰ ᠬᠣᠷᠢᠶᠠ ᠳᠤ ᠠᠵᠢᠯ ᠰᠢᠯᠵᠢᠵᠦ ᠣᠷᠴᠢᠭᠤᠯᠤᠭᠴᠢ᠂ ᠨᠠᠢᠷᠠᠭᠤᠯᠤᠭᠴᠢ᠂ ᠰᠤᠷᠪᠤᠯᠵᠢᠯᠠᠭᠴᠢ᠂ ᠨᠡᠪᠲᠡᠷᠡᠭᠦᠯᠦᠭᠴᠢ᠂ ᠠᠪᠢᠶᠠᠯᠠᠭᠴᠢ᠂ ᠤᠳᠤᠷᠢᠳᠤᠭᠠᠴᠢ᠂ ᠤᠷᠠᠯᠠᠭᠴᠢ᠂ ᠰᠤᠳᠤᠯᠤᠭᠴᠢ ᠵᠢᠨ ᠠᠵᠢᠯ ᠬᠢᠵᠠᠶ᠃ ᠷᠠᠳᠢᠣ᠋ ᠹᠷᠣᠨᠲ ᠳᠡᠭᠡᠷᠡ ᠨᠠᠢᠷᠠᠭᠤᠯᠬᠤ᠂ ᠰᠤᠷᠪᠤᠯᠵᠢᠯᠠᠬᠤ᠂ ᠫᠷᠣᠭ᠌ᠷᠠᠮ ᠲᠣᠬᠢᠷᠠᠭᠤᠯᠬᠤ ᠠᠵᠢᠯ ᠪᠣᠯᠭᠠᠨ ᠳᠤ ᠴᠠᠭᠠᠷᠠᠵᠤ᠂ ᠨᠠᠷᠢᠨ ᠨᠢᠮᠪᠠᠶ ᠬᠢᠳᠡᠭ ᠪᠠᠢᠭᠰᠠᠨ ᠪᠥᠭᠡᠳ ᠤᠳᠭᠠ ᠤᠷᠠᠯᠢᠭ ᠤᠨ ᠬᠡᠯᠲᠡᠰ ᠲᠦ ᠪᠠᠢᠬᠤ ᠳᠠᠭᠠᠨ ᠱᠣᠭ ᠶᠠᠷᠢᠶᠠ᠂ ᠰᠢᠯᠦᠭ᠂ ᠳᠠᠭᠤᠤ᠂ ᠶᠠᠪᠠᠭᠠᠨ ᠦᠯᠢᠭᠡᠷ ᠴᠤ᠌ ᠨᠡᠪᠲᠡᠷᠡᠭᠦᠯᠵᠡᠢ᠃ ᠲᠧᠯᠸᠢᠰ ᠬᠣᠷᠢᠶᠠᠨ ᠳ᠋ᠤ᠌ ᠢᠷᠡᠮᠡᠭᠴᠡ ᠺᠢᠨᠣ᠋ ᠣᠷᠴᠢᠭᠤᠯᠬᠤ ᠠᠵᠢᠯ ᠠᠴᠠ ᠭᠠᠷᠳᠠᠵᠤ ᠨᠢᠭᠡ ᠬᠥᠮᠦᠨ ᠣᠷᠴᠢᠭᠤᠯ ᠤᠨ ᠲᠠᠢᠯᠪᠤᠷᠢᠯᠠᠬᠤ᠂ ᠬᠣᠶᠠᠷ ᠬᠥᠮᠦᠨ ᠡᠭᠡᠯᠵᠢᠯᠡᠨ ᠲᠠᠢᠯᠪᠤᠷᠢᠯᠠᠬᠤ ᠵᠡᠷᠭᠡ ᠣᠯᠠᠨ ᠲᠠᠯᠠ ᠪᠠᠷ ᠲᠦ᠍ᠷᠰᠢᠵᠤ ᠠᠪᠢᠶᠠᠯᠠᠬᠤ ᠱᠠᠲᠤᠨ ᠳᠤ ᠣᠷᠤᠭᠤᠯᠵᠠᠢ᠃ ᠲᠡᠷᠡ ᠮᠣᠩᠭᠤᠯ ᠲᠧᠯᠸᠢᠰ ᠦᠨ ᠣᠷᠴᠢᠭᠤᠯ ᠤᠨ ᠦᠢᠯᠡᠳᠬᠦ ᠠᠵᠢᠯ ᠢ ᠬᠠᠷᠢᠭᠤᠴᠠᠵᠤ᠂ ᠤᠷᠢᠳ ᠬᠣᠵᠢᠳ 《ᠭᠤᠷᠪᠠᠨ ᠤᠯᠤᠰ ᠤᠨ ᠦᠯᠢᠭᠡᠷ》᠂ 《ᠵᠧᠦ ᠡᠸᠨ ᠯᠠᠶ》᠂ 《ᠨᠤᠷᠠᠭᠴᠢ》 ᠮᠡᠲᠦ ᠲᠣᠮᠣ ᠲᠣᠮᠣ ᠲᠧᠯᠸᠢᠰ ᠦᠷᠭᠦᠯᠵᠢᠯᠡᠭᠰᠡᠨ ᠵᠦ ᠴᠤ᠌ᠭᠡ ᠵᠢᠨ ᠣᠷᠴᠢᠭᠤᠯᠭᠠ ᠳᠤ ᠣᠷᠤᠯᠴᠠᠵᠤ᠂ 184 ᠤᠳᠠᠭᠠ ᠤᠳᠤᠷᠢᠳᠤᠭᠠᠴᠢ ᠪᠣᠯᠵᠤ᠂ 1791 ᠪᠦᠯᠦᠭ ᠲᠧᠯᠸᠢᠰ ᠵᠦ ᠴᠤ᠌ᠭᠡ ᠶᠢ ᠠᠪᠢᠶᠠᠯᠠᠬᠤ ᠳᠤ ᠣᠷᠤᠯᠴᠠᠵᠤ᠂ 843 ᠲᠦᠮᠡᠨ ᠦᠰᠥᠭ ᠦᠨ ᠣᠷᠴᠢᠭᠤᠯᠭᠠ ᠵᠢᠨ ᠡᠬᠡ ᠪᠢᠴᠢᠭ ᠢ ᠬᠢᠨᠠᠪᠠ᠃ ᠡᠭᠦᠨ ᠦ ᠬᠠᠮᠲᠤ 1979~ 1994 ᠣᠨ ᠤ ᠬᠣᠭᠤᠷᠤᠨᠳᠤ ᠲᠠᠪ ᠤᠨ ᠤᠳᠠᠭᠠ ᠵᠢᠨ ᠴᠠᠭᠠᠨ ᠰᠠᠷᠠ ᠵᠢᠨ ᠲᠧᠯᠸᠢᠰ ᠮᠣᠩᠭᠤᠯ ᠤᠳᠭᠠ ᠤᠷᠠᠯᠢᠭ ᠤᠨ ᠦᠳᠡᠰᠢᠯᠡᠭᠡ ᠵᠢᠨ ᠨᠡᠪᠲᠡᠷᠡᠭᠦᠯᠦᠭᠴᠢ᠂ ᠨᠠᠢᠷᠠᠭᠤᠯᠤᠭᠴᠢ᠂ ᠤᠳᠤᠷᠢᠳᠤᠭᠠᠴᠢ ᠪᠠᠢᠵᠤ᠂ 7 ᠪᠦᠯᠦᠭ ᠦᠷᠭᠦᠯᠵᠢᠯᠡᠭᠰᠡᠨ ᠲᠧᠯᠸᠢᠰ ᠵᠦ ᠴᠤ᠌ᠭᠡ 《ᠳᠤ》 ᠢ ᠬᠠᠷᠢᠭᠤᠴᠠᠨ ᠦᠢᠯᠡᠳ ᠴᠤ᠌᠂ 1989 ᠣᠨ ᠤ 1 ᠰᠠᠷᠠ ᠳᠤ ᠪᠣᠯᠤᠭᠰᠠᠨ ᠥᠪᠦᠷ ᠮᠣᠩᠭᠤᠯ ᠣᠷᠤᠨ ᠤ᠋ ᠠᠩᠬᠠᠳᠠᠭᠴᠢ ᠮᠣᠩᠭᠤᠯ ᠳᠠᠭᠤᠤ ᠵᠢᠨ ᠱᠠᠩᠨᠠᠯ ᠲᠦ᠍ ᠤᠷᠤᠯᠳᠤᠭᠠᠨ ᠢ ᠡᠷᠬᠢᠯᠡᠨ ᠬᠢᠵᠦ ᠪᠢᠯᠡ᠃ 1992 ᠣᠨ ᠳᠤ 《ᠥᠪᠦᠷ ᠮᠣᠩᠭᠤᠯ ᠤ᠋ᠨ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠣᠷᠤᠨ ᠪᠠᠢᠭᠤᠯᠤᠭᠳᠠᠭᠰᠠᠨ 35 ᠵᠢᠯ ᠦᠨ ᠣᠶ ᠶᠢ ᠳᠤᠷᠠᠰᠬᠠᠨ ᠪᠡᠯᠭᠡᠯᠡᠬᠦ ᠪᠣᠳᠠᠲᠤ ᠰᠢᠩᠭᠡᠭᠡᠯᠲᠡ ᠨᠡᠪᠲᠡᠷᠡᠭᠦᠯᠭᠡ》 ᠡᠷᠬᠢᠯᠡᠵᠦ᠂ ᠲᠠᠩ ᠢᠶᠠᠷ ᠪᠤᠶᠤ ᠪᠤᠰᠤᠳ ᠤᠨ ᠬᠠᠮᠲᠤ ᠬᠡᠲᠦ ᠬᠡᠳᠦᠨ ᠲᠤᠰᠭᠠᠢ ᠫᠷᠣᠭ᠌ᠷᠠᠮ ᠦᠢᠯᠡᠳᠴᠡᠢ᠃ ᠲᠡᠷᠡ ᠪᠠᠰᠠ ᠨᠠᠢ᠍ᠮᠠᠨ ᠮᠤᠵᠢ ᠬᠣᠲᠠ ᠣᠷᠤᠨ ᠤ᠋ ᠮᠣᠩᠭᠤᠯ ᠲᠧᠯᠸᠢᠰ ᠦᠨ ᠬᠠᠮᠵᠢᠯᠴᠠᠭᠠᠨ ᠤ ᠨᠡᠢᠭᠡᠮᠯᠢᠭ ᠢ ᠪᠠᠢᠭᠤᠯᠬᠤ ᠳᠤ᠂ ᠠᠩᠭᠯᠢ ᠬᠡᠯᠡᠨ ᠦ ᠲᠧᠯᠸᠢᠰ ᠬᠢᠴᠢᠶᠡᠯ ᠡᠷᠬᠢᠯᠡᠬᠦ ᠳᠦ᠂ ᠮᠣᠩᠭᠤᠯ ᠦᠰᠥᠭ ᠢ ᠺᠦᠮᠫᠢᠦᠲ᠋ᠧᠷ ᠲᠦ ᠣᠷᠤᠭᠤᠯᠬᠤ ᠳ᠋ᠤ᠌᠂ ᠲᠧᠯᠸᠢᠰ ᠨᠡᠷᠡ ᠲᠣᠮᠢᠶᠠ ᠶᠢ ᠨᠢᠭᠡᠳᠭᠡᠬᠦ ᠳ᠋ᠦ᠍ ᠣᠯᠠᠨ ᠠᠵᠢᠯ ᠬᠢᠭᠰᠡᠨ ᠪᠥᠭᠡᠳ ᠶᠡᠬᠡ ᠳᠡᠭᠡᠳᠦ ᠰᠤᠷᠭᠠᠭᠤᠯᠢ ᠳᠤ ᠴᠤ᠌ ᠲᠧᠯᠸᠢᠰ ᠨᠠᠢᠷᠠᠭᠤᠯᠭᠠ ᠵᠢᠨ ᠲᠤᠰᠭᠠᠢ ᠬᠢᠴᠢᠶᠡᠯ ᠣᠯᠠᠨ ᠣᠷᠣᠵᠠᠶ᠃ ᠨᠡᠢᠭᠡᠮ ᠳᠡᠭᠡᠷᠡ ᠥᠪᠦᠷ ᠮᠣᠩᠭᠤᠯ ᠤ᠋ᠨ ᠨᠡᠷᠡ ᠲᠣᠮᠢᠶᠠ ᠵᠢᠨ ᠺᠣᠮᠢᠰ ᠤᠨ ᠭᠡᠰᠢᠭᠦᠨ᠂ ᠪᠠᠷᠢᠮᠵᠢᠶᠠ ᠠᠪᠢᠶᠠᠨ ᠤ ᠠᠵᠢᠯ ᠤᠨ ᠺᠣᠮᠢᠰ ᠤᠨ ᠭᠡᠰᠢᠭᠦᠨ᠂ ᠲᠧᠯᠸᠢᠰ ᠤᠷᠠᠯᠢᠭᠴᠢᠳ ᠤᠨ ᠨᠡᠢᠭᠡᠮᠯᠢᠭ ᠦᠨ ᠪᠠᠢᠩᠭᠤ ᠵᠢᠨ ᠬᠡᠷᠡᠭ ᠡᠷᠬᠢᠯᠡᠭᠴᠢ᠂ ᠮᠣᠩᠭᠤᠯ ᠬᠡᠯᠡᠨ ᠦ ᠨᠡᠢᠭᠡᠮᠯᠢᠭ ᠦᠨ ᠬᠡᠷᠡᠭ ᠡᠷᠬᠢᠯᠡᠭᠴᠢ ᠵᠡᠷᠭᠡ ᠲᠤᠰᠢᠶᠠᠯ ᠡᠭᠦᠷᠭᠡᠯᠡᠵᠦ ᠪᠠᠢᠨᠠ᠃ ᠨᠡᠢᠲᠡᠯᠡᠭᠰᠡᠨ ᠥᠭᠦᠯᠡᠯ 《ᠮᠣᠩᠭᠤᠯ ᠲᠧᠯᠸᠢᠰ ᠦᠨ ᠬᠥᠯᠴᠢᠨ ᠲᠣᠭᠲᠠᠬᠤ ᠵᠢᠨ ᠤᠴᠢᠷ》᠂ 《ᠦᠨᠳᠦᠰᠦᠲᠡᠨ ᠦ ᠲᠧᠯᠸᠢᠰ ᠢ ᠪᠡᠶᠡ ᠪᠡᠨ ᠳᠠᠭᠠᠭᠠᠵᠤ ᠡᠷᠬᠢᠯᠡᠬᠦ ᠵᠢᠨ ᠤᠴᠢᠷ》 ᠭᠡᠬᠦ ᠮᠡᠲᠦ ᠬᠣᠷᠢ ᠭᠠᠷᠤᠶ ᠪᠠᠢᠨᠠ᠃
Copyight 2016 by nmgmzw.gov.cn All Rights Reserved
