ᠨᠡᠷᠡ:
ᠴᠢᠨᠳᠠᠮᠤᠨᠢ
ᠴᠢᠨᠠᠷ ᠤᠨ ᠢᠯᠭᠠᠯ:
ᠨᠢᠭᠤᠴᠠ
ᠬᠠᠷᠢᠯᠴᠠᠬᠤ ᠬᠡᠯᠪᠡᠷᠢ:
ᠵᠣᠬᠢᠶᠠᠭᠴᠢ ᠶᠢᠨ ᠲᠠᠨᠢᠯᠴᠠᠭᠤᠯᠭᠠ:
ᠴᠢᠨᠳᠠᠮᠤᠨᠢ︵ 1938—— ︶ ᠳᠤᠮᠳᠠᠳᠤ ᠤᠯᠤᠰ ᠤᠨ ᠠᠷᠠᠳ ᠤᠨ ᠴᠢᠯᠥᠭᠡᠯᠡᠬᠦ ᠴᠡᠷᠢᠭ ᠦᠨ ᠠᠷᠠᠳ ᠢᠶᠠᠨ ᠬᠠᠢᠷᠠᠯᠠᠬᠤ ᠵᠢᠱ᠌ᠢᠶᠡᠴᠢ᠃ ᠬᠣᠷᠴᠢᠨ ᠵᠡᠭᠦᠨ ᠭᠠᠷᠤᠨ ᠬᠣᠢᠲᠤ ᠬᠣᠰᠢᠭᠤᠨ ᠳᠤ ᠨᠤᠲᠤᠭ ᠲᠠᠢ᠂ ᠮᠣᠩᠭᠤᠯ ᠦᠨᠳᠦᠰᠦᠲᠡᠨ᠃ 1957 ᠣᠨ ᠤ 3 ᠰᠠᠷᠠ ᠳᠤ ᠳᠤᠮᠳᠠᠳᠤ ᠤᠯᠤᠰ ᠤᠨ ᠠᠷᠠᠳ ᠤᠨ ᠴᠢᠯᠥᠭᠡᠯᠡᠬᠦ ᠴᠡᠷᠢᠭ ᠲᠦ ᠣᠷᠤᠵᠤ᠂ 1961 ᠣᠨ ᠳᠤ ᠳᠤᠮᠳᠠᠳᠤ ᠤᠯᠤᠰ ᠤᠨ ᠡᠪ ᠬᠠᠮᠲᠤ ᠨᠠᠮ ᠤᠨ ᠭᠡᠰᠢᠭᠦᠨ ᠢᠶᠡᠷ ᠡᠯᠰᠡᠭᠳᠡᠵᠡᠢ᠃ ᠲᠡᠷᠡ ᠴᠡᠷᠢᠭ ᠲᠦ ᠣᠷᠤᠭᠰᠠᠨ ᠤ᠋ ᠪᠠᠨ ᠳᠠᠷᠠᠭᠠ ᠪᠠᠢᠯᠳᠤᠭᠴᠢ᠂ ᠲᠠᠰᠤᠭ ᠤᠨ ᠳᠠᠷᠤᠭᠠ᠂ ᠰᠠᠯᠠᠭᠠᠨ ᠳᠠᠷᠤᠭᠠ᠂ ᠳᠡᠳ᠋ ᠰᠤᠮᠤᠨ ᠳᠠᠷᠤᠭᠠ᠂ ᠠᠷᠠᠳ ᠤᠨ ᠵᠡᠪᠰᠡᠭᠲᠦ ᠬᠦᠴᠦᠨ ᠦ ᠬᠡᠯᠲᠡᠰ ᠦᠨ ᠲᠤᠰᠠᠯᠠᠭᠴᠢ᠂ ᠰᠠᠯᠠᠭᠠᠨ ᠳᠠᠷᠤᠭᠠ᠂ ᠳᠡᠳ᠋ ᠬᠡᠯᠲᠡᠰ ᠦᠨ ᠳᠠᠷᠤᠭᠠ᠂ ᠬᠡᠯᠲᠡᠰ ᠦᠨ ᠳᠠᠷᠤᠭᠠ ᠵᠡᠷᠭᠡ ᠲᠤᠰᠢᠶᠠᠯ ᠢ ᠬᠠᠷᠢᠭᠤᠴᠠᠭᠰᠠᠨ ᠶᠤᠮ᠃ ᠲᠡᠷᠡ ᠥᠪᠡᠷ ᠦ᠋ᠨ ᠠᠮᠢ ᠨᠠᠰᠤᠨ ᠤ ᠠᠶᠤᠯ ᠲᠦᠭᠰᠢᠭᠦᠷᠢ ᠶᠢ ᠪᠣᠳᠤᠯ ᠦᠭᠡᠢ ᠠᠷᠠᠳ ᠣᠯᠠᠨ ᠤ ᠠᠮᠢ ᠨᠠᠰᠤ ᠠᠮᠤᠷ ᠠᠮᠤᠭᠤᠯᠠᠩ᠂ ᠤᠯᠤᠰ ᠤᠨ ᠡᠳ᠋ ᠬᠥᠷᠦᠩᠭᠡ ᠶ᠋ᠢ ᠬᠠᠮᠠᠭᠠᠯᠠᠬᠤ ᠶᠢᠨ ᠲᠥᠯᠦᠭᠡ ᠦᠬᠦᠨ ᠵᠢᠳᠭᠦᠳᠡᠭ ᠶᠤᠮ᠃ ᠡᠷᠦᠬᠡ ᠶᠢᠨ ᠴᠡᠷᠢᠭ ᠦᠨ ᠭᠷᠠᠨᠠᠲ ᠰᠢᠳᠡᠬᠦ ᠰᠤᠷᠭᠠᠭᠤᠯᠢᠯᠠᠯ ᠳᠤᠮᠳᠠ ᠲᠡᠷᠡ ᠠᠮᠢ ᠨᠠᠰᠤᠨ ᠤ ᠠᠶᠤᠯ ᠲᠦᠭᠰᠢᠭᠦᠷᠢ ᠶᠢ ᠪᠣᠳᠤᠯ ᠦᠭᠡᠢ ᠪᠡᠷ ᠳᠡᠯᠪᠡᠷᠡᠭᠡ ᠦᠭᠡᠢ 3 ᠭᠷᠠᠨᠠᠲ ᠢ ᠨᠣᠴᠤᠭᠠᠵᠤ ᠲᠠᠯᠠᠪᠤᠷ ᠲᠤ ᠪᠠᠢᠭᠰᠠᠨ ᠡᠷᠦᠬᠡ ᠶᠢᠨ ᠴᠡᠷᠢᠭ ᠢ ᠦᠬᠦᠯ ᠦᠨ ᠠᠶᠤᠯ ᠠᠴᠠ ᠠᠪᠤᠷᠠᠪᠠ᠃ ᠣᠢᠲᠤ ᠣᠷᠤᠨ ᠪᠠ ᠲᠠᠯᠠ ᠨᠤᠲᠤᠭ ᠲᠤ ᠭᠠᠯ ᠲᠦᠢᠮᠡᠷ ᠭᠠᠷᠤᠭᠰᠠᠨ ᠳᠤ ᠲᠡᠷᠡ 4 ᠤᠳᠠᠭᠠ ᠭᠠᠯ ᠤᠨᠲᠠᠷᠠᠭᠠᠬᠤ ᠲᠠᠯᠠᠪᠤᠷ ᠲᠤ ᠣᠴᠢᠵᠤ᠂ ᠭᠠᠯ ᠲᠦᠢᠮᠡᠷ ᠬᠠᠮᠤᠭ ᠠᠴᠠ ᠠᠶᠤᠮᠠᠷ ᠳᠦᠷᠡᠯᠵᠡᠵᠦ ᠪᠠᠢᠭᠠ ᠭᠠᠵᠠᠷ ᠲᠤ ᠲᠡᠷᠡ ᠬᠦᠷᠴᠦ ᠭᠠᠯ ᠤᠨᠲᠠᠷᠠᠭᠠᠨ 9 ᠬᠣᠨᠤᠭ ᠦᠷᠭᠦᠯᠵᠢᠯᠡᠨ ᠲᠡᠮᠡᠴᠡᠵᠦ ᠲᠦᠢᠮᠡᠷ ᠢ ᠤᠨᠲᠠᠷᠠᠭᠠᠭᠰᠠᠨ ᠶᠤᠮ᠃ ᠲᠡᠷᠡ ᠬᠠᠮᠢᠭᠠ ᠣᠴᠢᠪᠠᠯ ᠲᠡᠨᠳᠡ ᠰᠠᠢᠨ ᠠᠵᠢᠯ ᠬᠢᠵᠦ ᠶᠠᠪᠤᠳᠠᠭ᠃ ᠲᠡᠷᠡ ᠦᠷᠭᠦᠯᠵᠢ ᠠᠮᠠᠷᠠᠯᠲᠠ ᠶᠢᠨ ᠴᠠᠭ ᠪᠠ ᠪᠠᠶᠠᠷ ᠳᠤᠷᠠᠰᠭᠠᠯ ᠤ᠋ᠨ ᠡᠳᠦᠷ ᠨᠠᠰᠤᠲᠠᠨ ᠢ ᠠᠰᠠᠷᠠᠬᠤ ᠬᠦᠷᠢᠶᠡᠯᠡᠩ ᠳᠦ ᠬᠦᠷᠴᠦ ᠭᠣᠣᠨᠢ ᠭᠠᠭᠴᠠᠭᠠᠷ ᠪᠣᠯᠤᠭᠰᠠᠨ ᠡᠪᠦᠭᠡᠨ ᠬᠥᠭᠰᠢᠳ ᠲᠦ᠍ ᠦᠰᠦ ᠵᠠᠰᠠᠵᠤ᠂ ᠬᠤᠪᠴᠠᠰᠤ ᠬᠤᠨᠠᠷ ᠢ ᠨᠢ ᠤᠭᠢᠶᠠᠨ ᠴᠡᠪᠡᠷᠯᠡᠵᠦ ᠥᠭᠳᠡᠭ᠃ 1981 ᠣᠨ ᠤ 2 ᠰᠠᠷᠠ ᠶᠢᠨ 17 ᠤ ᠡᠳᠦᠷ ᠳᠦᠭᠦᠷᠡᠲᠡᠯᠡ ᠠᠶᠠᠨᠴᠢᠳ ᠲᠡᠭᠡᠭᠡᠪᠦᠷᠢᠯᠡᠭᠰᠡᠨ ᠠᠶᠠᠨ ᠤ ᠮᠠᠰᠢᠨ ᠭᠠᠨᠵᠤᠭᠠ ᠪᠠᠯᠭᠠᠰᠤ ᠠᠴᠠ ᠮᠣᠷᠳᠠᠨ ᠭᠠᠷᠴᠤ ᠬᠠᠢᠰᠤᠭᠠᠢ ᠰᠢᠶᠠᠩ ᠵᠦᠭ ᠳᠠᠪᠬᠢᠬᠤ ᠳᠠᠭᠠᠨ ᠵᠠᠮ ᠤᠨ ᠭᠤᠳᠤᠰ ᠭᠠᠯ ᠤᠨ ᠠᠶᠤᠯ ᠭᠠᠷᠴᠤ ᠲᠡᠷᠭᠡ ᠳᠦᠭᠦᠷᠡᠩ ᠤᠲᠤᠭᠠ ᠭᠠᠯ ᠳᠡᠭᠳᠡᠵᠦ ᠠᠶᠠᠨᠴᠢᠳ ᠤᠨ ᠠᠮᠢ ᠨᠠᠰᠤ ᠠᠶᠤᠯ ᠳᠤ ᠤᠴᠠᠷᠠᠯᠠ᠃ ᠨᠤᠲᠤᠭ ᠲᠠᠭᠠᠨ ᠪᠤᠴᠠᠵᠤ ᠲᠥᠷᠦᠯ ᠰᠠᠳᠤᠨ ᠢᠶᠠᠨ ᠡᠷᠭᠢᠵᠦ ᠦᠵᠡᠬᠦ ᠪᠡᠷ ᠶᠠᠪᠤᠭᠠ ᠴᠢᠨᠳᠠᠮᠤᠨᠢ ᠶᠠᠭ ᠡᠨᠡ ᠲᠡᠷᠭᠡᠨ ᠳᠦ ᠰᠠᠭᠤᠵᠤ ᠪᠠᠢᠵᠠᠢ᠃ ᠲᠠᠢᠨ ᠮᠠᠰᠢᠨ ᠲᠡᠷᠭᠡᠨ ᠦ ᠡᠭᠦᠳᠡ ᠶᠢ ᠨᠡᠭᠡᠭᠡᠬᠦ ᠭᠡᠰᠡᠨ ᠳᠦ 40 ᠭᠠᠷᠤᠶ ᠠᠶᠠᠨᠴᠢᠳ ᠲᠡᠷᠭᠡᠨ ᠡᠭᠦᠳᠡᠨ ᠳᠡᠭᠡᠷᠡ ᠪᠥᠭᠡᠮᠨᠡᠷᠡᠭᠰᠡᠨ ᠪᠠᠢᠵᠠᠢ᠃ ᠲᠡᠷᠡ ᠲᠡᠷᠭᠡᠨ ᠵᠢᠯᠤᠭᠤᠴᠢ ᠶ᠋ᠢᠨ ᠲᠡᠷᠭᠡ ᠵᠠᠰᠠᠳᠠᠭ ᠪᠠᠨᠽᠢ ᠶᠢ ᠠᠪᠴᠤ ᠲᠡᠷᠭᠡᠨ ᠦ ᠰᠢᠯ ᠢ ᠬᠡᠮᠬᠡᠴᠢᠵᠦ᠂ ᠦᠰᠦᠷᠦᠨ ᠭᠠᠷᠤᠭᠠᠳ ᠤᠷᠢᠳ ᠢᠶᠠᠷ ᠡᠮᠡᠭᠲᠡᠢᠴᠦᠳ ᠪᠠ ᠥᠲᠡᠭᠦᠰ ᠢ᠋ ᠠᠪᠤᠷᠠᠨ ᠭᠠᠷᠭᠠᠪᠠ᠃ ᠬᠠᠮᠤᠭ ᠤᠨ ᠰᠡᠭᠦᠯᠡᠷ ᠨᠢᠭᠡᠨ ᠰᠣᠬᠤᠷ ᠬᠥᠮᠦᠨ ᠢ᠋ ᠠᠪᠤᠷᠠᠨ ᠭᠠᠷᠭᠠᠬᠤ ᠳᠤ ᠲᠡᠭᠦᠨ ᠦ ᠳᠡᠪᠡᠯ ᠬᠤᠪᠴᠠᠰᠤᠨ ᠳᠤ ᠭᠠᠯ ᠵᠣᠯᠭᠠᠵᠤ ᠦᠰᠦ ᠭᠡᠵᠢᠭᠡ ᠨᠢ ᠰᠢᠲᠠᠵᠤ᠂ ᠲᠣᠯᠤᠭᠠᠢ ᠨᠢ ᠬᠣᠶᠠᠷ ᠬᠡᠰᠡᠭ ᠰᠢᠷᠬᠠᠲᠤᠵᠤ᠂ ᠲᠡᠩᠬᠡ ᠲᠠᠮᠢᠷ ᠢᠶᠠᠨ ᠠᠯᠳᠠᠵᠤ ᠬᠦᠰᠡᠷ ᠣᠢᠴᠢᠵᠠᠢ᠃ ᠠᠶᠠᠨᠴᠢᠳ ᠲᠡᠭᠦᠨ ᠢ ᠲᠡᠳᠭᠦᠨ 50 ᠭᠠᠷᠤᠶ ᠮᠧᠲ᠋ᠷ ᠵᠠᠢᠳᠠᠲᠠᠯᠠ ᠮᠠᠰᠢᠨ ᠲᠡᠷᠭᠡ ᠳᠡᠯᠪᠡᠷᠡᠪᠡ᠃ ᠭᠡᠪᠡᠴᠦ 44 ᠠᠶᠠᠨᠴᠢᠳ ᠪᠣᠯᠤᠨ 2 ᠵᠢᠯᠤᠭᠤᠴᠢ ᠴᠢᠨᠳᠠᠮᠤᠨᠢ ᠶᠢᠨ ᠲᠤᠰᠠᠯᠠᠮᠵᠢ ᠪᠠᠷ ᠠᠮᠤᠷ ᠠᠮᠤᠭᠤᠯᠠᠩ ᠢᠶᠠᠷ ᠠᠶᠤᠯ ᠠᠴᠠ ᠮᠤᠯᠲᠤᠷᠠᠵᠠᠢ᠃ 1981 ᠣᠨ ᠤ 12 ᠰᠠᠷᠠ ᠶᠢᠨ 3 ᠤ ᠡᠳᠦᠷ ᠲᠥᠪ ᠦ᠋ᠨ ᠴᠡᠷᠢᠭ ᠦᠨ ᠶᠠᠪᠤᠳᠠᠯ ᠤᠨ ᠬᠣᠷᠢᠶᠠ ᠠᠴᠠ ᠴᠢᠨᠳᠠᠮᠤᠨᠢ ᠳᠤ 《ᠠᠷᠠᠳ ᠢᠶᠠᠨ ᠬᠠᠢᠷᠠᠯᠠᠬᠤ ᠵᠢᠱ᠌ᠢᠶᠡᠴᠢ》 ᠭᠡᠰᠡᠨ ᠢᠷᠠᠭᠤ ᠠᠯᠳᠠᠷᠲᠤ ᠴᠣᠯᠠ ᠣᠯᠭᠤᠭᠰᠠᠨ ᠶᠤᠮ᠃
Copyight 2016 by nmgmzw.gov.cn All Rights Reserved