ᠨᠡᠷᠡ:
ᠲᠠᠴᠠᠷ
ᠴᠢᠨᠠᠷ ᠤᠨ ᠢᠯᠭᠠᠯ:
ᠨᠢᠭᠤᠴᠠ
ᠬᠠᠷᠢᠯᠴᠠᠬᠤ ᠬᠡᠯᠪᠡᠷᠢ:
ᠵᠣᠬᠢᠶᠠᠭᠴᠢ ᠶᠢᠨ ᠲᠠᠨᠢᠯᠴᠠᠭᠤᠯᠭᠠ:
ᠲᠠᠴᠠᠷ︵ ᠦᠬᠦᠵᠦ ᠲᠥᠷᠦᠭᠰᠡᠨ ᠣᠨ ᠵᠢᠯ ᠨᠢ ᠪᠠᠯᠠᠷᠬᠠᠢ ︶ ᠶᠡᠬᠡ ᠮᠣᠩᠭᠤᠯ ᠤ᠋ᠨ ᠥᠷᠯᠦᠭ ᠵᠠᠩᠵᠤᠨ᠂ ᠴᠢᠩᠭᠢᠰ ᠬᠠᠭᠠᠨ ᠤ ᠣᠳᠭᠤᠨ ᠳᠡᠭᠦᠦ ᠲᠡᠮᠦᠭᠡ ᠣᠳᠴᠢᠭᠢᠨ ᠤ ᠬᠥᠪᠡᠭᠦᠨ᠂ ᠪᠠᠭᠠᠲᠤᠷ ᠬᠦᠴᠦᠨ ᠲᠡᠢ᠂ ᠪᠠᠢᠯᠳᠤᠭᠠᠨ ᠳᠤᠷ ᠭᠠᠷᠮᠠᠭᠠᠢ᠂ ᠪᠠᠭᠠ ᠶᠢᠨ ᠦᠶᠡ ᠳᠡᠭᠡᠨ ᠬᠡᠪᠲᠡᠭᠦᠯ ᠪᠠᠢᠵᠠᠢ᠃ ᠲᠣᠯᠤᠢ ᠲᠥᠷᠦ ᠭᠦᠷᠦᠨ ᠦ ᠬᠢᠨᠠᠭᠴᠢ ᠪᠣᠯᠤᠭᠰᠠᠨ ᠬᠤᠭᠤᠴᠠᠭᠠᠨ ᠳᠤ ᠶᠠᠨᠵᠢᠩ ᠣᠷᠤᠨ ᠳ᠋ᠤ᠌ ᠬᠤᠯᠠᠭᠠᠢ ᠳᠡᠭᠡᠷᠡᠮ ᠰᠠᠮᠠᠭᠤᠷᠠᠨ ᠪᠠᠶᠠᠨ ᠰᠠᠷᠲᠠᠸᠠᠬᠢ ᠨᠠᠷ ᠢ ᠰᠦᠷᠳᠡᠭᠦᠯᠦᠭᠰᠡᠨ ᠳᠦ ᠲᠠᠴᠠᠷ ᠪᠣᠯᠤᠨ ᠶᠧᠯᠢᠤᠶ ᠴᠦᠰᠡᠢ ᠶᠢ ᠲᠣᠮᠢᠯᠠᠨ ᠬᠤᠯᠠᠭᠠᠢ ᠳᠡᠭᠡᠷᠡᠮ ᠢ ᠠᠷᠢᠯᠭᠠᠵᠤ᠂ ᠲᠠᠳᠠᠨᠤᠰ 16 ᠲᠦᠷᠦᠭᠦᠦ ᠶᠢ ᠨᠢ ᠠᠯᠠᠵᠤ ᠠᠶᠤᠯ ᠬᠥᠨᠦᠭᠡᠯ ᠢ᠋ ᠠᠷᠢᠯᠭᠠᠵᠠᠢ᠃ ᠥᠭᠡᠳᠡᠢ ᠬᠠᠭᠠᠨ ᠶᠡᠬᠡ ᠴᠡᠷᠢᠭ ᠳᠠᠢᠴᠢᠯᠠᠨ ᠠᠯᠲᠠᠨ ᠤᠯᠤᠰ ᠢ ᠳᠠᠢᠯᠠᠬᠤ ᠳᠤ ᠲᠠᠴᠠᠷ ᠳᠠᠭᠠᠵᠤ ᠮᠣᠷᠳᠠᠨ ᠴᠡᠷᠢᠭ ᠮᠣᠷᠢ ᠶᠢᠨ ᠳ᠋ᠦ᠋ ᠶᠤᠸᠠᠨᠱᠤᠸᠠᠢ ᠪᠣᠯᠵᠤ ᠭᠣᠣᠯ ᠤᠨ ᠵᠡᠭᠦᠨᠳᠡᠬᠢ ᠣᠯᠠᠨ ᠵᠧᠦ ᠵᠢᠶᠦ᠋ᠨ ᠢ ᠰᠢᠭᠦᠷᠳᠡᠨ ᠲᠦᠩᠭᠤᠸᠠᠨ ᠢ ᠡᠪᠳᠡᠵᠦ ᠱᠠᠨᠰᠢ ᠯᠦᠸᠧ ᠶᠠᠩ ᠢ ᠡᠵᠡᠯᠡᠵᠡᠢ᠃ ᠲᠣᠯᠤᠢ ᠾᠧᠨᠠᠨ ᠥᠭᠡᠳᠡ ᠴᠡᠷᠢᠭᠯᠡᠬᠦ ᠳᠦ ᠲᠠᠴᠠᠷ ᠥᠭᠡᠳᠡᠢ ᠬᠠᠭᠠᠨ ᠢ ᠳᠠᠭᠠᠵᠤ ᠬᠣᠶᠠᠷ ᠭᠣᠣᠯ ᠤᠨ ᠬᠣᠭᠤᠷᠤᠨᠳᠤ ᠹᠦ ᠶ᠋ᠢ ᠡᠪᠳᠡᠨ ᠪᠠᠢ ᠫᠥᠸᠧ ᠶ᠋ᠢ ᠭᠡᠲᠦᠯᠪᠡ᠃ ᠥᠭᠡᠳᠡᠢ ᠲᠠᠴᠠᠷ ᠨᠠᠷ ᠢᠶᠠᠷ ᠪᠢᠶᠠᠨᠯᠢᠶᠠᠩ ᠢ ᠪᠦᠰᠡᠯᠡᠨ ᠴᠣᠬᠢᠭᠤᠯᠤᠭᠰᠠᠨ ᠳᠤ ᠠᠯᠲᠠᠨ ᠤᠯᠤᠰ ᠤᠨ ᠴᠡᠷᠢᠭ ᠯᠦᠭᠡ ᠨᠠᠨ ᠰᠢᠶᠦ᠋ᠨ ᠮᠧᠨ ᠬᠠᠭᠠᠯᠭᠠᠨ ᠳᠤ ᠨᠥᠷᠢᠯᠡᠨ ᠪᠠᠢᠯᠳᠤᠵᠠᠢ᠃ ᠠᠯᠲᠠᠨ ᠤᠯᠤᠰ ᠤᠨ ᠡᠵᠡᠨ ᠨᠢ ᠴᠠᠢᠵᠧᠤ ᠳᠤ ᠨᠡᠭᠦᠭᠰᠡᠨ ᠳᠦ ᠲᠠᠴᠠᠷ ᠴᠡᠷᠢᠭ ᠳᠠᠢᠴᠢᠯᠠᠨ ᠴᠠᠢᠵᠧᠤ ᠶᠢ ᠳᠣᠪᠲᠤᠯᠤᠭᠰᠠᠨ ᠶᠤᠮ᠃ ᠲᠠᠢᠽᠦ᠋ᠩ ᠦ᠋ᠨ ᠲᠠᠪᠤᠳᠤᠭᠠᠷ ᠣᠨ ︵ 1233 ︶ ᠤ ᠠᠷᠪᠠᠳᠤᠭᠠᠷ ᠰᠠᠷᠠ ᠳᠤ ᠴᠠᠢᠵᠧᠤ ᠬᠣᠲᠠ ᠶᠢᠨ ᠬᠠᠶᠠᠭᠠ ᠳᠤ ᠬᠦᠷᠴᠦ ᠬᠣᠷᠤᠭᠠ ᠪᠡᠬᠢᠯᠡᠯᠲᠡ ᠪᠠᠢᠭᠤᠯᠵᠤ ᠤᠷᠲᠤ ᠬᠤᠭᠤᠴᠠᠭᠠ ᠪᠠᠷ ᠪᠦᠰᠡᠯᠡᠬᠦ ᠪᠡᠷ ᠪᠡᠯᠡᠳᠭᠡᠵᠡᠢ᠃ 12 ᠰᠠᠷᠠ ᠳᠤ ᠰᠦᠩ ᠤᠯᠤᠰ ᠤᠨ ᠮᠧᠩ ᠭᠦᠩ ᠦ᠋ᠨ ᠴᠡᠷᠢᠭ ᠴᠠᠢᠵᠧᠤ ᠳᠤ ᠬᠦᠷᠴᠦ ᠢᠷᠡᠭᠡᠳ ᠬᠣᠶᠠᠷ ᠴᠡᠷᠢᠭ ᠬᠠᠮᠲᠤᠷᠠᠨ ᠬᠣᠲᠠ ᠶᠢ ᠳᠠᠭᠠᠷᠢᠨ ᠴᠣᠬᠢᠭᠰᠠᠨ ᠢᠶᠠᠷ ᠲᠠᠢᠽᠦ᠋ᠩ ᠦ᠋ᠨ ᠵᠢᠷᠭᠤᠳᠤᠭᠠᠷ ᠣᠨ ︵ 1234 ︶ ᠤ ᠬᠣᠶᠠᠳᠤᠭᠠᠷ ᠰᠠᠷᠠ ᠳᠤ ᠬᠣᠲᠠ ᠡᠪᠳᠡᠷᠡᠵᠦ᠂ ᠠᠯᠲᠠᠨ ᠤᠯᠤᠰ ᠤᠨ ᠲᠥᠷᠦ ᠮᠥᠬᠦᠵᠡᠢ᠃ ᠲᠠᠴᠠᠷ ᠳᠤᠮᠳᠠᠳᠤ ᠣᠷᠤᠨ ᠢ᠋ ᠳᠠᠷᠤᠩᠭᠤᠢᠯᠠᠨ ᠰᠠᠭᠤᠵᠤ᠂ ᠴᠡᠷᠢᠭ ᠢᠶᠡᠨ ᠬᠤᠪᠢᠶᠠᠨ ᠶᠡᠬᠡ ᠭᠣᠣᠯ ᠢ ᠰᠠᠬᠢᠭᠤᠯᠵᠤ ᠰᠦᠩ ᠤᠯᠤᠰ ᠤᠨ ᠴᠡᠷᠢᠭ ᠢ ᠬᠣᠷᠢᠭᠯᠠᠵᠠᠢ᠃ 6 ᠰᠠᠷᠠ ᠳᠤ ᠰᠦᠩ ᠤᠯᠤᠰ ᠤᠨ ᠬᠢᠨ 10 ᠭᠠᠷᠤᠶ ᠲᠦᠮᠡᠨ ᠴᠡᠷᠢᠭ ᠦᠨ ᠬᠦᠴᠦ ᠪᠡᠷ ᠭᠤᠷᠪᠠᠨ ᠨᠡᠢᠰᠯᠡᠯ ᠢ ᠪᠤᠴᠠᠭᠠᠨ ᠠᠪᠴᠠᠢ᠃ ᠰᠦᠩ ᠤᠯᠤᠰ ᠤᠨ ᠴᠡᠷᠢᠭ ᠦᠨ ᠲᠠᠭᠠᠷᠢᠯᠲᠠ ᠶᠢ ᠰᠦᠢᠷᠡᠭᠦᠯᠬᠦ ᠶᠢᠨ ᠲᠥᠯᠦᠭᠡ ᠾᠧᠨᠠᠨ ᠢ ᠰᠠᠬᠢᠵᠤ ᠰᠠᠭᠤᠭᠠ ᠰᠦᠪᠡᠭᠡᠳᠡᠢ᠂ ᠲᠠᠴᠠᠷ ᠬᠣᠶᠠᠭᠤᠯᠠ ᠴᠡᠷᠢᠭ ᠳᠠᠢᠴᠢᠯᠠᠨ ᠡᠮᠦᠨᠡᠰᠢ ᠪᠠᠭᠤᠪᠠ᠃ ᠲᠠᠴᠠᠷ ᠠᠨᠤ ᠯᠦᠸᠧ ᠶᠠᠩ ᠬᠣᠲᠠ ᠶᠢᠨ ᠵᠡᠭᠦᠨᠲᠡᠢ ᠴᠡᠷᠢᠭ ᠪᠦᠭᠭᠦᠵᠦ ᠰᠦᠩ ᠤᠯᠤᠰ ᠤᠨ ᠵᠠᠩᠵᠤᠨ ᠶᠠᠩ ᠢ ᠶᠢᠨ1.5 ᠲᠦᠮᠡᠨ ᠴᠡᠷᠢᠭ ᠢ ᠤᠰᠠᠳᠭᠠᠵᠠᠢ᠃ ᠲᠡᠭᠡᠭᠡᠳ ᠰᠦᠩ ᠤᠯᠤᠰ ᠤᠨ ᠭᠤᠷᠪᠠᠨ ᠨᠡᠢᠰᠯᠡᠯ ᠪᠤᠴᠠᠭᠠᠨ ᠠᠪᠬᠤ ᠭᠡᠰᠡᠨ ᠣᠷᠤᠯᠳᠤᠯᠭᠠ ᠨᠢ ᠢᠯᠠᠭᠳᠠᠯ ᠢᠶᠠᠷ ᠳᠠᠭᠤᠰᠴᠠᠢ᠃ ᠲᠠᠢᠽᠦ᠋ᠩ ᠦ᠋ᠨ ᠳᠣᠯᠤᠳᠤᠭᠠᠷ ᠣᠨ ︵ 1235︶ ᠤ ᠬᠠᠪᠤᠷ᠂ ᠥᠭᠡᠳᠡᠢ ᠬᠠᠭᠠᠨ ᠡᠮᠦᠨᠡᠰᠢ ᠳᠠᠢᠯᠠᠬᠤ ᠳᠤ ᠲᠠᠴᠠᠷ ᠠᠨᠤ ᠬᠦᠴᠦ ᠶᠢᠨ ᠵᠢᠯᠤᠭᠤᠳᠤᠯᠭᠠ ᠪᠠᠷ ᠴᠡᠷᠢᠭ ᠳᠠᠢᠴᠢᠯᠠᠨ ᠰᠢᠶᠠᠩ ᠶᠠᠩ ᠬᠣᠲᠠ ᠶᠢᠨ ᠬᠠᠶᠠᠭᠠ ᠳᠤ ᠬᠦᠷᠴᠦ᠂ ᠰᠢᠶᠠᠩᠶᠠᠩ ᠢ ᠡᠵᠡᠯᠡᠨ ᠦᠯᠡᠮᠵᠢ ᠶᠡᠬᠡ ᠠᠮᠤ ᠪᠤᠳᠠᠭᠠ᠂ ᠴᠡᠷᠢᠭ ᠦᠨ ᠬᠡᠷᠡᠭᠰᠡᠯ ᠢ ᠣᠯᠵᠠᠯᠠᠵᠠᠢ᠃ ᠰᠢᠶᠠᠨᠽᠦ᠋ᠩ ᠦᠨ ᠵᠢᠷᠭᠤᠳᠤᠭᠠᠷ ᠣᠨ ᠳᠤ︵1256︶ ᠮᠥᠩᠬᠡ ᠬᠠᠭᠠᠨ ᠬᠣᠶᠠᠷ ᠵᠠᠮ ᠤᠨ ᠴᠡᠷᠢᠭ ᠢ᠋ᠶ᠋ᠡᠷ ᠰᠦᠩ ᠤᠯᠤᠰ ᠢ ᠳᠠᠢᠯᠠᠬᠤ ᠳᠤ ᠲᠠᠴᠠᠷ ᠵᠡᠭᠦᠨ ᠵᠠᠮ ᠤᠨ 30 ᠲᠦᠮᠡᠨ ᠬᠤᠶᠠᠭ ᠴᠡᠷᠢᠭ ᠢ ᠳᠠᠢᠴᠢᠯᠠᠨ ᠵᠢᠩ ᠰᠢᠶᠠᠩ ᠢ ᠳᠠᠭᠠᠷᠢᠨ ᠳᠣᠪᠲᠤᠯᠪᠠ᠃ ᠳᠣᠯᠤᠳᠤᠭᠠᠷ ᠣᠨ ︵ 1257︶ ᠤ ᠨᠠᠮᠤᠷ ᠲᠠᠴᠠᠷ ᠤᠨ ᠴᠡᠷᠢᠭ ᠬᠠᠨᠵᠢᠶᠠᠩ ᠮᠥᠷᠡᠨ ᠳ᠋ᠦ᠍ ᠬᠦᠷᠴᠦ 10 ᠲᠦᠮᠡᠨ ᠮᠣᠷᠢᠲᠤ ᠴᠡᠷᠢᠭ ᠢᠶᠡᠷ ᠰᠢᠶᠠᠩᠶᠠᠩ᠂ ᠹᠠᠨᠴᠧᠩ ᠢ ᠴᠣᠬᠢᠭᠰᠠᠨ ᠳᠤ ᠰᠠᠷᠠ ᠭᠠᠷᠤᠶ ᠪᠣᠷᠤᠭᠠᠨ ᠵᠤᠳ ᠪᠣᠯᠤᠭᠰᠠᠨ ᠲᠤᠯᠠ ᠠᠷᠭᠠ ᠪᠤᠰᠤ ᠴᠡᠷᠢᠭ ᠢ᠋ᠶ᠋ᠡᠨ ᠲᠠᠲᠠᠵᠤ ᠬᠣᠢᠰᠢ ᠤᠬᠤᠷᠢᠪᠠ᠃ ᠮᠥᠩᠬᠡ ᠬᠠᠭᠠᠨ ᠨᠥᠭᠴᠢᠭᠰᠡᠨ ᠦ᠌ ᠳᠠᠷᠠᠭᠠ ᠬᠠᠭᠠᠨ ᠰᠠᠭᠤᠷᠢᠨ ᠢ ᠪᠤᠯᠢᠶᠠᠯᠳᠤᠬᠤ ᠲᠡᠮᠡᠴᠡᠯ ᠳᠤᠮᠳᠠ ᠲᠠᠴᠠᠷ ᠬᠤᠪᠢᠯᠠᠢ ᠶᠢᠨ ᠲᠠᠯᠠ ᠳᠤ ᠡᠷᠡᠰ ᠵᠣᠭᠰᠤᠵᠠᠢ᠃ ᠵᠦᠩ ᠲᠦᠩ ᠦᠨ ᠠᠩᠬᠠ ᠣᠨ︵ 1260︶ ᠳᠤ ᠲᠠᠴᠠᠷ᠂ ᠬᠠᠲᠠᠨ ᠮᠡᠲᠦ ᠶᠢᠨ ᠲᠥᠷᠦᠯ ᠦᠨ ᠸᠠᠩ ᠨᠠᠷ ᠤᠨ ᠬᠠᠮᠲᠤ ᠰᠠᠨᠳᠤ ᠭᠡᠢᠪᠦᠩ ᠬᠦᠷᠳᠦ ᠪᠠᠯᠭᠠᠰᠤᠨᠠ ᠶᠡᠬᠡ ᠬᠤᠷᠠᠯᠲᠠᠢ ᠬᠤᠷᠠᠯᠳᠤᠭᠤᠯᠵᠤ ᠬᠤᠪᠢᠯᠠᠢ ᠶᠢ ᠲᠡᠳᠭᠦᠨ ᠬᠠᠭᠠᠨ ᠰᠠᠭᠤᠷᠢᠨᠠ ᠰᠠᠭᠤᠯᠭᠠᠵᠤ ᠬᠣᠵᠢᠮ ᠨᠢ ᠪᠠᠰᠠ ᠠᠷᠢᠭᠪᠦ᠋ᠬᠡ ᠶᠢ ᠳᠠᠢᠯᠠᠨ ᠲᠦᠪᠰᠢᠳᠭᠡᠬᠦ ᠲᠤᠯᠤᠯᠳᠤᠭᠠᠨ ᠳᠤ ᠣᠷᠤᠯᠴᠠᠵᠠᠢ᠃ ᠵᠦᠩ ᠲᠦᠩ ᠦᠨ ᠬᠣᠶᠠᠳᠤᠭᠠᠷ ᠣᠨ︵1261 ︶ ᠤ ᠨᠠᠮᠤᠷ ᠠᠷᠢᠭᠪᠦ᠋ᠬᠡ ᠳᠠᠬᠢᠨ ᠴᠡᠷᠢᠭ ᠳᠠᠢᠴᠢᠯᠠᠨ ᠰᠠᠨᠳᠤ ᠭᠡᠢᠪᠦᠩ ᠬᠦᠷᠳᠦ ᠪᠠᠯᠭᠠᠰᠤᠨᠠ ᠰᠢᠬᠠᠨ ᠢᠷᠡᠭᠰᠡᠨ ᠳᠦ ᠬᠤᠪᠢᠯᠠᠢ ᠬᠠᠭᠠᠨ ᠴᠡᠷᠢᠭ ᠳᠠᠢᠴᠢᠯᠠᠨ ᠰᠢᠮᠥᠳᠥ ᠨᠠᠭᠤᠷ ᠲᠤ ᠤᠭᠲᠤᠨ ᠪᠠᠢᠯᠳᠤᠪᠠ᠃ ᠲᠠᠴᠠᠷ ᠲᠦᠮᠡᠨ ᠮᠣᠷᠢᠲᠤ ᠴᠡᠷᠢᠭ ᠳᠠᠢᠴᠢᠯᠠᠨ ᠲᠤᠯᠤᠯᠳᠤᠭᠠᠨ ᠳᠤ ᠣᠷᠤᠯᠴᠠᠵᠤ ᠠᠷᠢᠭᠪᠦ᠋ᠬᠡ ᠶᠢᠨ ᠴᠡᠷᠢᠭ ᠢ ᠶᠡᠬᠡᠳᠡ ᠡᠪᠳᠡᠵᠦ 5000 ᠭᠠᠷᠤᠶ ᠭᠠᠵᠠᠷ ᠬᠣᠯᠠ ᠭᠠᠷᠲᠠᠯᠠ ᠨᠡᠬᠡᠮᠵᠢᠯᠡᠨ ᠴᠣᠬᠢᠵᠠᠢ᠃
Copyight 2016 by nmgmzw.gov.cn All Rights Reserved